04.12.2009
Hin árlega 1. des. samkoma KAG var einstaklega vel heppnuð að þessu sinni. Skemmtileg söngstund með eldri borgurum, frábært
hangikjötskvöld í Lóni, árangursríkt bögglauppboð og heldur betur óvænt uppákoma í lokin!
16.11.2009
Í kvöld byrjuðum við KAG félagar að æfa jólalögin. Því fylgir alltaf sérstök stemmning, enda var venju
fremur létt yfir mönnum á æfingunni. Svo erum við líka búnir að heimta Valmar söngstjóra úr klóm svínaflensunnar,
en hann hefur ekki getað verið með okkur á undanförnum æfingum.
05.11.2009
Í kvöld tók Karlakór Akureyrar-Geysir þátt í tónleikum í Akureyrarkirkju, til styrktar Aflinu, samtökum gegn kynferðis- og heimilisofbeldi. Þar komu fram auk KAG; Friðrik Ómar, Óskar Pétursson, Inga Eydal, Hundur í
óskilum og Heimir Ingimarsson. Kynnir var Bryndís Ásmundsdóttir leik- og söngkona.
26.10.2009
KAG fær góða heimsókn á næstunni þegar félagar í Karlakórnum Drífanda á Fljótsdalshéraði
koma norður til Akureyrar. Eftir góða skoðunarferð um Eyjafjörðinn sameinast kórarnir á tónleikum í Glerárkirkju, laugardaginn 7.
nóvember, kl. 16.
21.09.2009
Nú er sumri tekið að halla og það þýðir meðal annars að hefðbundið vetrarstarf kórsins fer í gang. Fyrsta æfingin
verður mánudagskvöldið 21. september og hefst klukkan átta í Lóni. Nú verður sá háttur hafður á æfingum að fyrir
kaffi á mánudögum verða raddæfingar en eftir kaffi á miðvikudögum verður síðan farið í eldra efni, sem þarf að halda
við og við eigum að kunna. Ýmislegt verður gert í vetur, smátt og stórt...
20.09.2009
Nú er farið að síga á sumarið og það þýðir að Karlakór Akureyrar - Geysir hefur starfsemi að
nýju. Reyndar erum við búnir að vera duglegir í sumar við alls konar uppákomur en nú er sem sagt
komið að venjulegum æfingum og hefðbundnu vetrarstarfi. Valmar verður áfram stjórnandi okkar og held ég að allir séu ánægðir
með það.
07.07.2009
Þrátt fyrir að hefðbundnu starfsári Karlakórs Akureyrar-Geysis ljúki að vori, eru ýmis verkefni yfir sumarið, sum hefðbundin, önnur
tilfallandi. Það sem af er sumri hefur KAG sungið á skemmtun Sjómannadagsins á Akureyri og kórinn kom fram á Ráðhústorgi á
hátíðarhöldum vegna 17. júní. Svo var eitt mánudagskvöld sungið fyrir alþjóðlegan hóp lækna, sem hittust á
Akureyri. Það var svo farið að hausta þegar KAG tók þátt í Akureyrarvöku í lok ágúst og söng um borð í
Húna II ásamt Kvennakór Akureyrar.
19.05.2009
Aðalfundur Karlakórs Akureyrar-Geysis var haldinn mánudaginn 18. maí. Að venju og samkvæmt lögum KAG, var farið yfir hefðbundin
mál: Formaðurinn flutti ítarlega skýrslu starfsársins, endurskoðaðir reikningar voru lagðir fram og samþykktir og kosið var í
nýja stjórn og nefndir. Líflegar umræður sköpuðust síðan undir liðnum "önnur mál" og margir félagar tóku til
máls.
18.05.2009
Jæja, þá eru okkar árvissu vortónleikar að baki og byrjuðum við á að flytja dagskrána í Hrísey, eða
"Miðbænum", eins og sumir kalla eyjuna, eftir að Grímsey bættist í púkkið. Tónleikarnir voru haldnir í nýju fjölnota húsi
eyjaskeggja og gengu vel. Skiptumst við félagarnir á að kynna lögin, en þegar Steini, starfsmaður hússins, steig upp og kynnti "Lóan er komin"
vakti það mikla kátínu. Steini er þekktur fugla-áhugamaður og veit allt um lóuna ekki síður en rjúpuna.
18.05.2009
Jæja, þá er hápunkti vetrarins náð og vortónleikarnir að baki. Föstudaginn 15. var farið í Hrísey, sem sumir kalla nú
"Miðbæinn", eftir að Grímsey bættist í púkkið. Þar voru sungnir tónleikar í nýjum fjölnota sal eyjarskeggja í
íþróttahúsinu. Gekk það vel og kom um helmingur eyjarskeggja auk nokkurra landkrabba. Kórfélagar skiptust á að kynna lögin og
Steini, starfsmaður hússins, kynnti "Lóan er komin" og mæltist það afar vel fyrir, þar sem Steini er þekktur fuglaáhugamaður.