Fréttir

Félagar í Karlakór Akureyrar-Geysi óska öllum velunnurum sínum gleðilegra jóla og farsældar á nýju ári. Vonandi sjáum við sem flesta á tónleikum okkar á árinu 2009.

Það er orðin hefð hjá KAG að safnast saman í Lóni að kvöldi 1. desember og borða saman hangikjöt með öllu tillheyrandi. Þangað bjóðum við konum okkar, eldri kórfélögun og fleirum. Á undan fer kórinn og syngur fyrir vistmenn á Hlíð, dvalarheimili aldraðra. Hangikjötskvöldið tókst vel að þessu sinni, mikið borðað, sungið og hlegið.

Styrktartónleikarnir fyrir Mæðrastyrksnefnd Akureyrar tókust afar vel.  Húsfyllir var í Akureyrarkirkju og mikil og hátíðleg stemmning. Kórarnir þrír; Kvennakór Akureyrar, Karlakór Akureyrar-Geysir og Söngfélagið Sálubót, fengu afar góðar móttökur tónleikagesta.

KAG verður í samstarfi við Kvennakór Akureyrar á jólatónleikum í Akureyrarkirkju næstkomandi sunnudag, 30. nóvember, kl. 16. Um er að ræða árlega styrktartónleika Kvennakórsins fyrir Mæðrastyrksnefnd. Fram koma: Kvennakór Akureyrar, Karlakór Akureyrar-Geysir, og Söngfélagið Sálubót. Stjórnendur og undirleikarar: Jaan Alavere, Valmar Valjaots og Tarvo Nómm.  Miðaverð er 1.500 krónur, en frítt fyrir 12 ára og yngri. Allur ágóði af tónleikunum rennur óskiptur til Mæðrastyrksnefndar.

Karlakór Akureyrar-Geysir fékk það óvenjulega og skemmtilega verkefni í gær að hita upp fyrir heimaleik Akureyrar og Hauka í N1 deildinni í handbolta. Meiningin var að blása handboltahetjunum og áhorfendum baráttu í brjóst með kröftugum karlakórssöng! Vissulega sungum við karlarnir hraustlega en það dugði hinsvegar ekki til sigurs gegn Haukum, því okkar menn steinlágu fyrir hafnfirsku hetjunum. Við KAG félagar erum þó sannfærðir um að söngurinn hjálpaði upp á stemmninguna, engin spurning!  Sjá myndir frá upphituninni hér!

Heklumót hið sautjánda var haldið á Húsavík laugardaginn 1. nóvember. Þátt tóku átta kórar, víðs vegar að af sambandssvæðinu; Ernir, Bólhlíðingar, Heimismenn, Dalvíkingar, Eyfirðingar, KAG, Hreimur og Drífandi. Kórarnir mættu hver á fætur öðrum og byrjuðu á að fá sér kaffi og hitta aðra kórmenn. Sameiginleg æfing hófst svo upp úr tíu. Valmar hitaði menn upp og svo tók hver stjórnandinn við af öðrum.

Laugardaginn 1. nóvember verður haldið Heklu-mót á Húsavík. Hekla, samband norðlenskra karlakóra stendur fyrir þessu móti fjórða hvert ár og er þetta hið sautjánda í röðinni. Þessi mót eru algjör veisla fyrir áhugafólk um kórsöng. Hver kór fyrir sig syngur þrjú lög og síðan syngja allir kórarnir saman fimm lög.

Þessa dagana æfir KAG fyrir söngmót Heklu, Sambands norðlenskra karlakóra, sem haldið verður á Húsavík 1. nóvember næstkomandi. Þangað hafa tíu kórar boðað komu sína, en reikna má með að 350 karlar hefji þar upp raust sína.

Karlakórinn Þrestir er þessa dagana á söngferð um landið og tónleikar í höfuðstað Norðurlands eru að sjálfsögðu á dagskrá! Þrestirnir syngja í Glerákirkju á sunnudaginn, 28. sept. og hefjast tónleikarnir klukkan 16:00. Karkakór Akureyrar-Geysir ætlar að syngja fyrir félaga sína Þrestina og hefja tónleikana með nokkrum lögum!

Það var vel mætt á fyrstu æfingu haustsins í kvöld. Ríflega 40 kallar mættu í Lón og nokkur ný andlit í hópnum! Þetta lofar góðu fyrir veturinn, sem verður vonandi viðburðaríkur og skemmtilegur. Fyrsta stóra verkefni vetrarsins verður Heklumót, norðlenskra karlakóra, sem haldið verður á Húsavík í nóvember.