Kötlumót á Flúðum

Kórinn tók þátt í Kötlumóti á Flúðum laugardaginn 16. okt. Þar voru mættir 14 kórar úr Kötlu, sambandin sunnlenskra kóra auk tveggja gestakóra, þ.e.a.s. Karlakór Akureyrar-Geysir og nýr finnskur kór "Manifestum". Karlakór Hreppamanna sá um mótið og sýndu það og sönnuðu að þar er valinn maður í hverju rúmi bæði til söngs og vinnu. Undirbúningur allur var hreint frábær.        Að sjálfsögðu gisti Karlakór Akureyrar-Geysir á Hótel Geysi og stillti sér upp við Strokk til að endurgera gamla mynd í Lóni. Jæja, mótsdagurinn hófst með sameiginlegri æfingu allra kóranna í Límtréshöllinni. Vel á sjöunda hundrað söngmanna voru mættir ásamt Stórsveit suðurlands, sem lék undir þennan stóra "Kötlukór" í sameiginlegum lögum.

       Eftir hádegi var formleg setning mótsins. Þar voru flutt ávörp af fyrrverandi formanni Kötlu og forseta okkar, Ólafi Ragnari Grímssyni. Síðan hófst söngur þátttökukóra í tveimur húsum. Við sungum í félagsheimilinu fyrir fullu húsi, og þar var mættur forseti vor, Ólafur Ragnar. Tókst það með eindæmum vel og fengum við gríðar góðar undirtektir frá áheyrendum. Seinna sama dag var svo "Kötlukórinn" allur samankominn á pöllum í Límtréshúsinu og það er eitthvað sem gleymist seint. Alveg rosalegur kór, sem hægt er að finna á "youtube" syngjandi "Ár vas alda".

       Þá bauð Karlakór Hreppamanna til kveðjuskálar í Íþróttahúsinu, meðan höllinni var breytt í veislusal. Þangað var farið aftur um hálf átta og allt orðið klárt fyrir framhaldið. Þar fluttu ýmsir ávörp og mikið var spjallað. Kristjana Stefáns  kom og djassaði svolítið ásamt hljómsveit. Ný Kötlustjórn var kynnt, Jón Bjarnason veislustjóri og kynnir lét alla viðstadda blístra gamalt lag og forsetinn okkar var með allan daginn fram á kvöld. Formaður Sambands Íslenskra Karlakóra (Snorri Guð) hugleiddi nöfnin á samböndunum Heklu og Kötlu, Sæmdi aldnar hetjur úr röðum kórmanna æðsta heiðursmerki sambandsins, gullmerkinu og sagði í restina frá fyrirhuguðu SÍK-móti, sem hugsanlega gæti orðið í Hörpunni haustið 2012 eða 2013.

       Þetta ferðalag okkar KAG-manna suður verður örugglega meðal þeirra minnisverðustu um langan tíma. Hreppamenn, hafið þökk fyrir alla ykkar vinnu og til hamingju með stórglæsilegt mót!!!