Karlakór Akureyrar-Geysir

Nokkrar hagnýtar upplýsingar um Karlakór Akureyrar-Geysi.

Á Akureyri störfuðu lengi tveir karlakórar, Karlakórinn Geysir (stofnaður 1922) og Karlakór Akureyrar (stofnaður 1929). Kórarnir voru fjandvinir; báðir höfðu sömu markmið en kepptust um félaga og athygli. Kringum 1980 fór veldi þessara sönghópa dvínandi og kórarnir voru við það að verða ófærir um að syngja sökum fækkunar.

Árið 1990 var ákveðið að sameina kórana og þann 11. október það ár varð til skilgetið afkvæmi þessara tveggja gömlu merkiskóra: Karlakór Akureyrar - Geysir. Fyrsti formaður hins nýja kórs var Ingvi Rafn Jóhannsson og söngstjóri Roar Kvam. Núverandi formaður er Snorri Guðvarðsson, söngstjóri er Valmar Väljaots og kórfélagarnir eru um 60.

Heimili KAG er í Lóni við Hrísalund sem kórinn á og rekur. Húsnæðið er leigt út til ýmissa aðila, þegar kórinn er ekki að nota það sjálfur, bæði í langtímaleigu og til einstaka viðburða.

Reglulegt starfsár kórsins hefst í september og lýkur í maí. Á sumrin tekur kórinn þó þátt í ýmsum hátíðahöldum í bænum, til dæmis á sjómannadag, 17. júní og á Akureyrarvöku. Hefðbundin vetrardagskrá inniheldur jólatónleika í einhverju formi, vortónleika, söngferðir út og suður, söng við jarðarfarir og ýmis önnur tækifæri, kaffihlaðborð, þar sem kórinn kemur fram og syngur og fleira mætti telja. Auk þess hefur KAG staðið fyrir “Hæ tröllum“, fjögurra kóra móti á Akureyri í mars flest ár síðan 2005.

Að sjálfsögðu má hvorki gleyma reglulegum söngæfingum, sem haldnar eru tvisvar í viku, - á mánudögum og miðvikudögum frá kl. 20 til kl. 22, né ýmsum samkomum sem kórinn heldur fyrir félaga sína. Þar má til dæmis nefna árshátíð, jólahlaðborð og þorrablót. Það er stefna kórsins að makar félaga séu ætíð velkomnir, bæði á samkomur og í söngferðir.

Á tónleikum klæðast kórfélagar svörtum smóking, viðeigandi hvítri skyrtu og hafa svarta slaufu um háls. Lindi er ekki notaður. Þennan klæðnað þurfa menn að leggja sér til sjálfir. Hann má til dæmis fá í JMJ, Hagkaupum eða Dressmann.

Flest félög þurfa að leggja félagsgjöld á meðlimi sína til að standa undir rekstri. KAG er þar engin undantekning, jafnvel þótt margir kórfélagar vinni mikið starf fyrir kórinn í sjálfboðavinnu. Nú er félagsgjaldið 10.000 krónur á ári, sem velja má um að greiða í upphafi starfsárs (og þá með afslætti), eða fá senda heim greiðsluseðla í nóvember og febrúar.

Viltu ganga í kórinn? Hringdu þá endilega í Snorra formann í síma 863-1419. Vertu hjartanlega velkominn!